GENERAL SANTOS CITY – Desidido na si Mayor Ronnel Rivera nga si P/S/Supt. Ruel Berango na ang opisyal nga labaw sa General Santos City Police Office.
Sa pakighinabi sa Bombo Radyo, gibutyag sa mayor nga ang kulang na lamang mao ang pormal gayud nga pagdawat kang Berango isip PNP city director.
Sumala pa nga alang sa naasoy’ng posisyon, mas maayong pili-on kadtong taga-GenSan ug nasuhito na sa siyudad, sama ni Berango. Hinungdan nga angayan lamang si Berango sa posiyon.
Kahinumduman nga adunay lima ka pangalan ang gisumite ug gipili-an aron mahimong labaw sa kapulisan sa siyudad.
Samtang, kalabot sa reklamo sa isyu sa imoralidad batok kang Berango, gibutyag ni Mayor Rivera nga gisumite na niya ang reklamo ngadto kang Regional Director Cedrick Train, gumikan ang liderato sa kapulisan aron kini na ang muhimo ug imbestigasyon.
Kahinumduman usab nga una nang gideklara sa GenSan City Council si Berango isip persona non grata, gumikan sa wala niini gilayong pagtuman sa kamanduan gikan sa lokal nga panggamhanan sa pagpasirado ug pagpaundang sa operasyon sa Small Town Lottery (STL) sa dakbayan.
