GENERAL SANTOS CITY – Gikaalarma ni City Mayor Ronnel Rivera sa impormasyon nga may gun for hire dinhi sa siyudad.
Kini human masikop si Jan Eliser Caban nga gitudlong responsable sa pagpusil-patay kang PO1 Glen Alicarte, ug uban pang pagpamusil nga natala dinhi sa siyudad.
Kahibaluan nga base sa resulta sa gihimong ballistic examination sa pusil nga narekober sa suspek, 14 ka shooting incidents ang nag-match.
Matud sa kapulisan sa dakbayan, nga sa pagkasikop kang Caban, 6.25% sa homicide cases under investigation dinhi sa siyudad gikan July 2016 hangtod December 2017 ang nahatagan ug kasulbaran.
Gikabutyag nga si Caban ang may 13 ka kaso sa murder, ug usa ka frustrated murder.
Gumikan niini, gihagit ni Mayor Rivera ngadto sa kapulisan nga gukdon ug panubagon ang mga susama kang Caban nga mga gun for hire ug uban pang mga may dautang binuhatan.
