Magpadayon ang lokal nga panggamhanan sa Heneral Santos sa ikaduhang hugna sa profiling sa mga tricycle drivers nga gustong malakip sa fuel subsidy sa gobyerno.
Gipahibalo ni Atty. Jong Gonzales pinaagi sa iyang Facebook post nga usa sa mga kinahanglanon aron malakip sa profiling mao ang voter’s certification o voter’s ID, sumala sa ordinansa sa syudad. Kini gikinahanglan sa Accounting Department aron malikayan ang problema sa disbursement ug masiguro nga kompleto ang requirements sa pag-apod-apod sa ayuda.
Gipaklaro usab nga ang Public Safety Office (PSO) Gensan dili magkuha sa mga original voter’s certificate sa mga tricycle drivers. Kini gikuha lamang sa panahon sa pag-apply og prangkisa ug kinahanglan nga anaa sa folder sa prangkisa, busa dili kini mahimo ihatag ngadto sa Accounting Office.
Nanawagan ang lokal nga panggamhanan sa pagsabot sa mga drivers nga dili malakip karong adlawa, kay aduna pay ikaduhang hugna sa profiling. Matud pa sa mayor sa syudad, buot nilang matabangan ang mga tricycle drivers, apan kinahanglan nga musunod sa balaod aron hapsay ug lig-on ang pag-apod-apod sa fuel subsidy.
