GENERAL SANTOS CITY- Mahinayon na gayud ning tuiga ang pag-apil ni Rachelle Valerie Faeldin sa Mutya ng Pilipinas 2018.
Kini human nga kahinumduman nga nailad siya kaniadto sa nagpailang organizer nga taga-dakbayan nga maoy rason nganong wala nakaapil sa Mutya ng Pilipins 2017.
Kagahapong adlawa subling mibalik sa Sangguniang Panglungsod si Faeldin aron muhangyo ug suporta sa iyang pag-apil sa nasampit nga beauty pageant.
Ug gani, sa natigayong sesyon kagahapon sa SP, gisaysay ni Faeldin kung sa unsa siya napili nga mahimong official candidate sa Mutya ng Pilipinas 2018.
Miadto matud pa siya sa Davao kaniadtong Hunyo aron didto magpa-screening kung asa siya lang ang nakuha sa 10 ka mga kandidata.
Nakadawat matud pa siya ug e-mail, ug matag karon ug unya gitawagan sa taga-Mutya ng Pilipinas 2018 alang sa maong kompetisyon.
Dungan niini, nagpasalamat si Faeldin sa lokal nga panggamhanan sa GenSan sa pagsuporta sa iyang pangandoy nga maangkon ang korona sa Mutya ng Pilipinas.
Kahinumduman nga miaging tuig naulawan si Faeldin human nga napresenta na niya ang kaugalingon sa GenSan City Council apan napurnada ang pag-apil sa maong pageant human nailad sa organizer.
Gikatakdang mubiyahe si Faeldin paingon sa Kauluhan sa Agosto 23, alang sa Mutya ng Pilipinas 2018 nga matigayon sa September 17.
