GENERAL SANTOS CITY- Dili lamang sa mga entry ug exit points sa kadalanan sa siyudad ang nag-inistrikto karon isip kabahin sa mas gipahugtan nga pagbantay seguridad sa katawhan.
Kini gumikan bisan sa General Santos International Airport ang gapahigayon na usab ug profiling sa mga mga pasahero, aron mapaniguro nga walay makalusot nga mga dautang tawo, hilabi na ang mga terorista.
Matag pasahero nga musulod sa departure area ang kinahanglang magpakita ug identification card kon ID, aron masusi pag-ayo ang ilhanan sa mga pasahero.
Kini ang bag-ong proseso nga gipatuman karon sa aviation security unit, aron mapaniguro usab ang seguridad sa mga pasahero, ug mahimong luwas ang matag flight gikan sa mga dautang elementi.
Gawas sa profiling, ginapahubo usab ang sapatos sa mga pasahero sa pag-agi nila sa final metal detector.
Dungan niini, nanawagan ang airport police ngadto sa mga pasahero nga makigkooperar na lamang, aron malikayan nga mas madelatar ang proseso.
Kahibaluan nga dinhi sa dakbayan ug mga kasikbit lugar, ang mga tawo nga gasulod ang gaagi sa profiling sa mga checkpoints, alang usab sa susamang tumong, ang seguridad sa katawhan sa siyudad.
