GENSAN- Nakadawat og daghang pasidungog ang General Santos City gikan sa National Nutrition Council Region XII tungod sa padayong paningkamot niini sa pagpalig-on sa mga programa sa nutrisyon ug pagsulbad sa malnutrisyon atol sa 2026 Regional Nutrition Awarding Ceremony.
Personal nga gidawat ni City Mayor Lorelie Geronimo Pacquiao ang mga awards uban sa mga awardee sa siyudad, nga nagpakita sa padayong pagpaningkamot sa lokal nga panggobyerno sa pagpaayo sa nutrisyon ug pagpalambo sa kahimsog ug kaayohan sa mga residente sa Gensan.
Mitambong usab si City Councilor Joey Dinopol, chairman sa Committee on Health and Sanitation, atol sa maong kalihokan alang sa pag-ila sa mga nutrition worker ug programa sa siyudad.
Lakip sa gipasidunggan si Shienna Mae Almeria sa Barangay San Isidro nga ginganlan og Outstanding Barangay Nutrition Scholar ug City Outstanding BNS.
Gipasidunggan usab ang mga local nutrition focal point sa siyudad, diin ginganlan si City Nutrition Action Officer Dr. Lalaine Calonzo isip Outstanding City Nutrition Action Officer, samtang si City Nutrition Program Coordinator Imelda Silvero isip Outstanding City Nutrition Program Coordinator.
Nakadawat si Calonzo og P15,000 nga cash award, samtang P10,000 usab ang nadawat ni Silvero.
Giila usab ang General Santos City isip Green Banner Seal of Compliance Awardee sa ikatulong sunod-sunod nga tuig, isip pag-ila sa padayong pagpatuman sa mga programa ug interbensyon alang sa nutrisyon.
Nakadawat usab ang siyudad sa Regional Award for Innovative Service Deliveries on Eradicating Malnutrition o RAISE tungod sa mga inisyatibo niini sa pagsulbad sa malnutrisyon pinaagi sa mga bag-ong pamaagi sa paghatod sa serbisyo.
Nagpakita ang maong mga pasidungog sa padayong paningkamot sa city government, nutrition workers, barangay nutrition scholars ug uban pang stakeholders sa pagpalig-on sa mga programa batok sa malnutrisyon ug pagpalambo sa kahimsog sa mga residente sa General Santos City.
