Gatusan ka sako sa uling gikan sa Alabel nga giagi sa dagat, nakumpiska sa GenSan

GENERAL SANTOS CITY – Mukabat sa 140 ka sako sa uling ang nakumpiska sa kapulisan sa Bula ning dakbayan, kaganihang kaadlawon.

Kini human matud pa sila nakadawat ug impormasyon kalabot sa sako-sako nga uling nga gibilin sa baybayon partikular sa Zone 3 Brgy Bula ning siyudad, bandang alas-2:30 sa kaadlawon.

Aduna matud pay kinatibuk-ang kantidad nga P16,800 ang nasampit nga mga uling.

Base sa impormasyon, gisakay matud pa sa motorized bangka ang naasoy’ng mga sinako nga uling, gikan sa Alabel.

Kahibaluan nga hugot ang checkpoint ug pagbantay sa mga otoridad sa Sarangani batok sa mga sinako nga uling nga ginabiyahe pasulod dinhi sa siyudad.

Sa karon nagpabilin sa kustodiya sa Bula Police Station ang nasampit nga mga uling.