Gibarugan sa Gatchalian bloc nga ang ilang lakang sa pagbag-o sa liderato sa Senado uyon sa kasamtangang mga precedent ug sa desisyon sa Korte Suprema sa kaso nga Avelino v. Cuenco, diin giila ang bisa sa quorum bisan dili kompleto ang presensya sa mga miyembro.
Matod pa sa taho, ang maong pagbag-o sa liderato sa senado nahitabo human sa tulo ka adlaw nga wala pagtambong sa Cayetano bloc sa mga nakatakda nga sesyon nga maoy hinungdan sa pagdeklarar nga bakante ang tanang posisyon sa Senado. Ang maong pag-usab sa liderato giila sa House of Representatives ug sa Office of the President .
Apan hugot nga gisupak kini sa Cayetano bloc, nga miingon nga kinahanglan og 13 ka boto aron ideklarang bakante ang mga posisyon sa Senado base sa 24 ka miyembro niini, apil si Senador Jinggoy Estrada ug Senador Ronald “Bato” Dela Rosa nga dili aktibong nakatambong sa mga sesyon.
Giingon pa ni Senador Alan Peter Cayetano nga “wala silay 13, bisan Grade 1 makabalo moihap,” ug giingon nga walay awtoridad ang ilang gihimo.
Ang Partido Demokratiko Pilipino, nga apil nila Dela Rosa, Bong Go, ug Robin Padilla, nagplano nga mosang-at og petisyon sa Korte Suprema aron kuwestiyunon ang legalidad sa maong pagbaylo sa liderato.
Sa panig sa Malacañang, miingon si Communications Undersecretary Claire Castro nga may katungod ang Cayetano bloc nga idala kini sa Korte Suprema apan aduna nay precedent sa 2015 Senate session diin giila ang 12 quorum nga walay pagsupak sa Korte.
