Angay pangutan-on ang Department of Justice (DOJ) kon pila ang nagasto sa pag-apas kang kanhi Kongresista Arnolfo Teves Jr. sa Timor-Leste.
Mao kini ang tubag ni Presidential Communications Office Assistant Secretary Erel Cabatbat, kinsa kabahin sa extraction team nga miadto sa Timor-Leste.
Matod ni Cabatbat, gi-coordinate sa DOJ ang pick-up sa Teves gikan sa Timor-Leste gamit ang Philippine Air Force flight Air Force 142.
Si Cabatbat niingon nga ang iyang nahibaw-an mao nga gibayran ang aviation fuel nga gigamit sa biyahe, apan gawas niini, wala na siyay laing impormasyon sa gasto sa biyahe.
Kauban ni Cabatbat ang mga opisyal sa DOJ, National Bureau of Investigation (NBI) Director Jaime Santiago, mga representante sa Bureau of Immigration, ug mga piloto ug tripulante sa Philippine Air Force.
Matod ni Cabatbat, nihapit una sila sa Sugbo aron mokuha og laing sakop sa extraction team ug magpagasolina sa Davao City una pa molarga paingon sa Timor-Leste.
Kalabot sa pasangil sa anak ni Teves nga gikidnap ang iyang amahan, si Cabatbat niingon nga iyang girespito ang iyang panglantaw, apan gipatuman lang sa gobyerno ang balaod sa Pilipinas sa mga warrant of arrest nga giluwatan batok sa kanhi kongresista.
