Gihinumdoman sa OPM icon nga si Gary Valenciano ang iyang kasinatian sa pagka-diagnose kaniadto og kidney cancer atol sa iyang pagpakita sa vlog sa aktor nga si Luis Manzano.
Matod ni Valenciano, nadiskubre ang iyang cancer human siya miagi og heart bypass surgery diin nakita usab sa doktor ang pleural effusion o pagpondo sa tubig sa iyang wala nga baga.
Gisaysay niya nga iyang gipatawag sa iyang balay ang pipila niyang kauban sa industriya aron siya mismo ang mosulti bahin sa iyang kahimtang.
Lakip sa mitambong sila Luis Manzano ug iyang asawa nga si Jessy Mendiola, ingon man ang mga singer nga sila Martin Nievera ug Toni Gonzaga.
Matod ni Valenciano, nakaamgo siya niadtong higayona kung unsa kalalom ang paghigugma ug suporta sa iyang mga higala sa industriya.
Gipaambit usab niya ang iyang kasinatian samtang nagpaopera siya alang sa cancer ug giingon nga nakasinati siya og kalinaw samtang nag-ampo ug nagsalig sa Diyos.
Si Valenciano, nga cancer-free na karon, miingon nga nakat-onan niya kung unsa ka matinud-anon ang iyang pagtuo ug pagsalig sa Diyos human sa maong lisod nga hugna sa iyang kinabuhi.
