Gibulgar ni kanhi Philippine Charity Sweepstakes Office (PCSO) General Manager Royina Garma ang usa ka indibidwal nga duol kang Senator Bong Go kabahin sa financial operations kabahin sa kontrobersiyal nga maduguon nga war on drugs sa administrasyong Duterte.
Sa testimonya ni Garma sa House Quad Committee niadtong Biyernes, gitumbok niini ang usa ka alias “Muking” kung asa natumbok kini nga si Espino nga staff member ni Go sa opisina niini sa Davao City Hall niadtong mayor pa si Duterte og nagpadayong magtrabaho kang Go hangtod siya ang nahimong Special Assistant to the President sa Malacañang nga naserbisyo nga Assistant Secretary sa iyang opisina.
Gibutyag ni Garma sa komite ang matod pa reward system alang sa Extra Judicial Killings(EJK).
Sa affidavit ni Garma iyang gitudlo si ex-PRRD og Go nga maoy nagtukod sa nationwide campaign sa war on drugs nga nagresulta sa daghang kaso sa EJK.
Gibutyag ni Garma nga niadtong 2016 gikontak siya ni Espino aron kuhaon ang contact information ni kanhi Criminal Investigation and Detection Group (CIDG) Region 11 Chief Col. Edilberto Leonardo base sa hangyo ni ex-PRRD.
Girekomenda ni Garma si Leonardo nga pangunahan ang national anti-drug task force nga nag-replicate sa Davao Model.
Gidetalye usab ni Garma ang relasyon ni Espino kang Peter Parungo, nga usa ka non-PNP personnel nga maoy nagadumala sa dagkong kantidad sa salapi nga ginapadala sa nagkadaiyang bank accounts niadtong panahon sa drug war operations.
Matod kang Garma nagpadayag og kabalaka si Parungo tungod sa dagkong kantidad sa salapi ang misulod sa account niya.
Natumbok nga ang mga accounts ni Parungo nga Metrobank, BDO, og PS Bank ang maoy primary conduits sa mga transaksiyon.
Sa karon ginaimbestigahan na sa Quad Comm ang intersection sa illegal Philippine Offshore and Gaming Operators (POGO), drug syndicates, og drug-related EJKs.
Naghinamhinam usab ang mga magbabalaud nga mabulgar ang role ni Espino.
Sa musunod nga pagdungog gipaabot nga matumbok ang pinansiyal nga aspeto sa anti-drug campaign.
Gibutyag ni Barbers nga mahinongdanon nga masundan ang money trail.
