GENERAL SANTOS CITY – Gipaambit sa Minnesota Timberwolves ang ilang paghina-hinam nga masugdan na ang game 1 sa western conference finals batok Dallas Mavericks.
Kini human 20 ka tuig usab ang nakalabay una sila nakabalik subli niini nga yugto.
Samtang ang Dallas Mavericks nakatamak na niini duha ka tuig na ang milabay, apan pakyas gihapon nga makuha ang kampeonato gumikan nahimong kampiyon niadtong tungura ang Golden State Warriors.
Maong ning higayona ang Timberwolves ug Mavericks sa Western Conference finals paningkamutan nga makahimo ug bag-ong kasaysayan bisan kung mahimong usa ka pisikal nga best-of-seven series ang maangkon.
Kahinumdoman nga ang Minnesota gikan sa Game 7 win batok sa reigning champion nga Denver Nuggets sa conference semifinals.
Ang Timberwolves nabiyaan og 20 puntos sa sayong bahin sa second half apan misulong og balik aron mapukan ang Nuggets.
Samtang gipildi usab sa Dallas ang Los Angeles Clippers sulod sa unom ka dula sa conference quarterfinals, ug gipukan niini ang top-seeded team sa West nga Oklahoma City Thunder sulod lang usab sa game 6 sa semifinals.
Ang duha ka mga koponan kausa ra nagkita sa playoffs sa wala pa kini nga serye. Niadtong 2002, gipildi sa Mavericks ang Timberwolves sa first-round series nga ang nahimong top scorers sila si Dirk Nowitzki alang sa Dallas ug Kevin Garnett alang sa Minnesota.
