Padayong mibuhos ang patimbaya alang kang kanhi Pinoy boxing champion Manny Pacquiao human mapili isip Hall of Famer class of 2025.
Ang dugay nang trainer ug coach niini nga si Freddie Roach, maoy nangulo sa paghatag ug tribute.
Matod ni Roach nga dako ang iyang kalipay tungod sa pagsulod sa pangalan ni Pacquiao sa International Boxing Hall of Fame.
Saysay pa sa beteranong boxing coach, nga niadtong 2001 dihang giablihan niya ang iyang Wild Card Boxing Club, nanghinaot siya nga dunay mosunod sa tunob ni Muhammad Ali.Wala kini mapakyas dihang misulod si Pacquiao sa iyang training camp.
Sulod sa 20 ka tuig nga gihuptan si Pacquiao, nasubay niini ang malampuson niyang boxing career, ilabi na sa mga pagkolekta niya sa mga nagkadaiyang boxing belts.
Gawas kang Roach, pipila ka mga Pinoy boxers og mga atleta ang mitimbaya sa kanhi senador.
Kahinumdoman nga gipasalamatan ni Pacquiao ang pagpili kaniya tungod kay wala kalimti ang iyang mga paningkamot aron mahimong malampusong boksidor.
