GENERAL SANTOS CITY – Gilauman na matud pa sa kaparian nga ibala sa mga Maute group ang ilang mga bihag sa nagpadayon nga kasmok sa Marawi City.
Matud pa ni Fr. Raul Valle, nagtuo siya nga gamiton sa mga terorista ang ilang mga bihag kon maipit na sila aron i-pa pull-out ang tanang tropa sa gobyerno sa Marawi og sa palibot sa Lanao del Sur pati na ang paghunong sa pagpahigayon og air strike sa AFP batok sa teroristang grupo.
Gibutyag ni Fr Valle nga nakigsimpatiya silang mga pari sa nadangatan karon ni Fr Chito Suganob og sa uban pang mga bihag, apan kon pwede man lang ibuhis ang kinabuhi, pwede kini nga himuon.
Hinuon, nanghinaut gihapon nga luwas nga mabuhian ang mga bihag.
Nasayran nga viral karon sa internet ang gipagawas sa ISIS linked Maute terror group nga video sa ilang mga bihag kung asa makita si Fr Chito nga nanawagan kay Presidente Rodrigo Duterte nga luwason sila sa kamot sa teroristang grupo.
