GENSAN – Nagpagawas ug datos ang Center for Health Development–SOCCSKSARGEN Region nga nagpakita nga gikan Disyembre 21 hangtod Disyembre 29, ning tuiga, adunay 25 ka kaso sa fireworks-related injuries (FWRI) nga natala sa rehiyon ug kini mas ubos og 29% kumpara sa 35 ka kaso sa samang petsa sa 2024.
Tanan sa maong kaso resulta sa paggamit sa pabuto diin lima ang may eye injury, napulo ug siyam ang wala naputlan ug tudlo,samatang usa ang adunay naputlan ug usa usab ang nakasinati og pagkabungol.
Ang pinaka bata nga biktima kay 2-anyos ug ang pinakatigulang kay 78-anyos samtang 23 niini lalaki ug duha ang babaye.
Pinakadaghan nga kaso natala sa South Cotabato nga adunay napulo ka biktima ug gisundan sa North Cotabato nga may walo. Aduna usab tulo-tulo ka kaso sa Sarangani ug Sultan Kudarat ug usa lamang sa General Santos City.
Ang nangunang klase sa pabuto nga nalambigit sa insidente mao ang 5-Star nga may pito ka kaso, gisundan sa Kwitis nga lima, Triangle nga tulo ug Sparkler nga duha nga nagpadayag sa padayon nga pahinumdom sa mga otoridad nga pilion ang luwas ug responsable nga pagsaulog sa Bag-ong Tuig aron malikayan ang kadaot ug disgrasya.
