Natapos na ang kampanya sa Paris Olympics sa mga Filipina gymnast nga sila si Levi Ruivivar, Emma Malabuyo, ug Aleah Finnegan.
Pakyas sila nga makasulod sa sa Top 24 sa artistics gymnastics nga gipahigayon sa Bercy Arena.
Kahibaloan nga nakigtigi ang tulo sa Subdivision 3 diin nagsugod sila sa balance beam, diin si Ruivivar adunay 11.866 puntos, samtang si Finnegan adunay 11.466 puntos ug Malabuyo adunay 12.233 puntos.
Sa floor exercise, si Finnegan nakadawat og 12.733, Malabuyo adunay 13.100 ug Ruivivar 12.433.
Sa vault, si Ruivviar adunay 13.600 puntos ug Malabuyo adunay 13.266 samtang si Finnegan adunay 13.383.
Natapos ang ilang rotation sa uneven bar diin si Malabuyo miiskor og 12.500, samtang si Finnegan adunay 12.566 ug Ruivivar 13.200.
Kini nagpasabot nga sila si Ruivivar ug Malabuyo nagtabla sa ika-28 ug ika-29 nga adunay kinatibuk-ang 51.099 puntos samtang si Finnegan anaa sa ika-33 nga adunay kinatibuk-ang 50.498 puntos.
Ang Top 24 lang nga mga atleta ug top 8 sa matag apparatus ang makaabanse sa Finals nga duha ra ka atleta matag nasud ang maka-qualify.
Bisan og napakyas ang tulo, nakahimo gihapon sila og kasaysayan tungod kay sulod sa 60 ka tuig karon na usab nga adunay pambato ang nasud sa gymnast sa Olympics.
Ulahing adunay representante ang Pilipinas sa maong event sa Olympiada niadtung 1964 Tokyo Summer Olympics diin gipadala niini si Evelyn Magluyan ug Maria-Luisa Floro.
