GENSAN- Posible nang ipagpadayon pag-usab karong semanaha ang face-to-face classes sa tanang pampublikong elementarya ug sekondaryang eskwelahan sa General Santos City.
Base sa joint press conference sa City Government sa General Santos ug DepEd General Santos City karong Agosto 11, 2026, mahimong magsugod ang face-to-face classes bisan unsang adlaw sulod niining semanaha.
Gimandoan ang tanang eskwelahan nga hugot nga ipatuman ang ilang School Safety Primer ug mga protocol alang sa kaluwasan ug seguridad sa mga estudyante ug personnel.
Lakip niini ang paggamit lamang sa mga classroom sa ground ug second floor, regular nga mubo nga emergency drills, klarong proseso sa paghiusa pag-usab sa mga estudyante ug ilang pamilya, ug hapsay nga sistema sa komunikasyon panahon sa emerhensya.
Gitugotan usab ang mga school head sa pagpili sa labing angay nga learning modality, sama sa full face-to-face, limited face-to-face, modular, online o blended learning, depende sa kaandam ug panginahanglan sa matag eskwelahan.
Gipahinumdoman ang tanang estudyante, magtutudlo ug personnel nga magpabiling alerto ug kalmado, ug unahon kanunay ang kaluwasan samtang hinay-hinay nga mibalik sa normal nga operasyon ang mga eskwelahan.
