Pormal nang nibalik ug nagsugod karung adlawa ang face-to-face classes sa mga eskwelahan sa General Santos City human sa sunod-sunod nga pagsuspinde sa klase tungod sa mga aftershocks nga nasinati sa siyudad.
Sa pipila ka sitwasyon sa mga tulunghaan ning dakbayan anam-anam nga nangabot ang mga estudyante alang sa ilang unang adlaw sa pagbalik sa face-to-face classes.
Gipahigayon ang pagsuspinde sa klase sa miaging mga bulan isip pag-amping sa kaluwasan sa mga estudyante, magtutudlo ug personnel tungod sa mga paglinog ug aftershocks nga nasinati sa pipila ka bahin sa siyudad lakip na usab ang nahitabo nga school threat kaniadtong milabayng semana nga naka postpone usab sa face to face class.
Karong balik na ang face-to-face classes, gidasig ang mga estudyante ug mga magtutudlo nga magpabiling alerto ug mosunod sa mga safety protocols sa ilang tagsa-tagsa ka eskwelahan, ilabina kung adunay paglinog o aftershock ug uban pang mga katingad-an nga mahitabo sulod mga tulunghaan.
Samtang, padayon usab ang pagmonitor sa mga otoridad ug mga school officials sa kahimtang sa mga eskwelahan aron masiguro ang kaluwasan sa tanan samtang nagpadayon ang klase.
