GENERAL SANTOS CITY – Extortion ang nakita nga motibo sa kapulisan sa pagsunog sa delivery van sa KCC Mall–GenSan sa national highway, Brgy. Tuyan, Malapatan, Sarangani.
Kini ang gibutyag ni Provincial Director Sr. Supt. Joseph Semillano nga alas nueve sa buntag nahitabo ang pagsunog sa mga armadong lalaki sa delivery van nga panag-iya sa KCC Mall.
Matud sa opisyal nga nagpadayon ang gihimong imbestigasyon ni Police Chief Inspector Teng Bacal, hepe sa Malapatan Police station sa naasoy nga insidente.
Kahinumduman nga nagpaila nga mga sakop sa New Peoples Army (NPA) ang lima ka mga armadong lalaki nga mipakanaug sa driver nga si Ronald Sanchez, 40-anyos, lima ka mga pahinante nga silang Bahinting Mijares, 22, Jerolyn Palate, 29, Lea Quirante, 34, Virgil Alvarado, 26, ug Julieto Sabandal, 23.
Karga sa nahisgutang van ang asukal, bugas, noodles, bottled water ug uban nga baligya.
Gani nagpadayon ang paggukod sa kapulisan sa mga armadong lalaki human midagan paingon sa bukid nga bahin.
Gani gibana-banaang mukabat sa P2.5 million ang gibilin nga danyos human gilamoy sa kalayo ang delivery van.
