GENERAL SANTOS CITY – Posible matud pa nga extortion attempt o may kalambigitan sa communist o terrorist groups ang pagbuto nga natigayon sa may National highway sa Barangay Sibsib, Tulunan North Cotabato kagahapon sa udto.
Base kini sa nahimong pamahayag sa PNP sa padayong imbestigasyon sa insidente nga nagresulta sa kamatayon sa duha katawo og may unom nga nasamdan.
Sa pakighinabi sa Bombo Radyo GenSan, gibutyag ni PLt. April Soria, tigpamaba sa Cotabato Police Provincial Office, nga tanang anggulo ang imbestigahan sa kapulisan aron madetermina ang posibleng motibo og mailhan ang mga responsable sa insidente.
Sa karon nakaalerto ang mga otoridad og hugot ang ginapahigayong pagbantay sa tanang checkpoint sa lugar.
Ginahulat pa ang impormasyon og post blast investigation sa Explosive Ordnance Disposal (EOD) aron matumbok kung unsa nga eksplosibo ang mibuto apil ang bomb-signature nga makatudlo kung unsa nga grupo nga nagpaluyo sa pagbuto.
Nanawagan si PLt. Soria sa may kasayuran sa pagpamomba nga makig-alayon gilayon sa mga otoridad og maghatag og impormasyon nga makatabang nga masulbad ang kaso.
Ang tulo ka samaron ang stable na ang kahimtang samtang ang laing usa pa ka biktima ang nagpabilin gihapon sa ospital human nga giatake og high blood.
Ang duha katawo nga nakasinati og trauma human ang nasinatiang kusog nga pagbuto ang nakagawas na sa tambalanan.
Kahinumduman nga kagahapon alas 12:30 sa udto dihang gibulabog sa makusog nga pagbuto ang gikamatay duha katao nga nailhan nga silang Gina Paunon, 53, minyo og residente sa Barangay Cajelo, Tulunan, North Cotabato og Ryan Panibayo sa Barangay Nabundasan Tulunan.
Partikular nga natigayon ang pagbuto sa may Natl. highway duol sa temporary ticketing booth sa Yellow Bus Line.
