Gisuspinde pag-usab sa Bureau of Internal Revenue o BIR ang pagkolekta sa excise tax sa liquefied petroleum gas o LPG sugod kagahapon, Setyembre 28, 2026 pinaagi sa Revenue Memorandum Circular No. 100-2026.
Ang maong lakang subay sa Executive Order No. 125 nga gipirmahan ni Pangulong Ferdinand R. Marcos Jr. niadtong Setyembre 25 ubos sa Republic Act No. 12316 aron makahatag og temporaryong kahupayan sa mga konsumante.
Sumala kang BIR Commissioner Charlito Martin R. Mendoza, gipatuman ang suspensyon human makumpirma sa Department of Energy nga miabot sa $99.41 kada bariles ang average nga presyo sa Dubai crude oil gikan Agosto 13 hangtod Setyembre 11, nga milapas sa $80 nga threshold nga gitakda sa balaod.
Ubos sa bag-ong mando, hingpit nga gisuspinde ang excise tax sa LPG, gawas lamang kung gamiton kini isip ‘raw material’ sa ‘petrochemical industry’ o isip pangpaandar sa sakyanan, ug gisuspinde usab ang buhis sa gas gawas kung gamiton kini isip panggatong sa eroplano.
Awtomatikong ibalik ang regular nga pagkolekta sa buhis kung mokunhod pag-usab ngadto sa ubos sa $80 kada bariles ang presyo sa lana sulod sa usa ka semana human sa sertipikasyon sa DOE, o kung molabay na ang tulo ka bulan sukad sa pagka-epektibo sa mando.
Kahinumduman nga unang gipatuman sa BIR ang susamang suspensyon niadtong Abril 17, apan gibawi kini niadtong Hulyo 8 human mikunhod pag-usab ang presyo sa petrolyo sa ‘international market’.
