Gidakop sa kapolisan ang kanhi pulis ug ang drayber niini nga maoy nagpaluyo sa pagkahanaw sa beauty pageant contestant nga si Catherine Camilon sa Balayan, Batangas.
Matod sa Police Regional Office 4A nga ilang nasikop si kanhi Police Major Allan de Castro sa Barangay Caloocan sa lungsod sa Balayan. Nasikop usab ang driver-bodyguard niini nga si Jeffrey Magpantay.
Ang duha nag-atubang og kasong kidnapping ug serious illegal detention tungod sa pagkawala ni Camilon sa miaging tuig.
Una na nga gibasura ang kaso batok sa duha niadtong Mayo 15 tungod sa kakulang sa ebidensya apan ang duha nag-atubang usab sa samang kaso nga gipasaka sa Batangas Regional Trial Court.
Kahinumduman nga gi-contempt si de Castro atol sa hearing sa Senado ug natanggong kini sa Senate detention facility apan nakagawas usab human sa duha ka adlaw.
Sa imbestigasyon nasayran nga adunay relasyon si de Castro sa biktima diin siya ang katapusan nga kuyog niini sa wala pa kini mawala.
