Gipahamtangan nga guilty beyond reasonable doubt sa San Fernando Municipal Trial Court Branch IV si kanhi PDEA intelligence agent Jonathan Morales sa kasong perjury alang sa pagpamakak niini sa iyang testimoniya sa usa ka drug case kaniadtong 2011.
Sa 11 panid nga desisyon nga gipagawas kaniadtong Miyerkules, gisentensiyahan sa korte si Morales og 5 ka bulan nga pagkapriso og gisilotan ug multa nga P1,000 nga adunay kauban nga subsidiary imprisonment ugaling walay mabayad sa multa.
Kahinumduman nga giakusahan si Morales og pagpamakak sa iyang testimoniya kaniadtong Hunyo 2011 og Setyembre 2011 sa pag-atubang niini sa korte batok sa 2 Chinese nationals nga gidudahan ngta nalambigit sa drug trafficking.
Sa iyang gipanumpaan nga pahayag, gibutyag niya nga responsable ang maong mga Chinese sa pagbaligya, pagdala o pag-distribute og ilegal nga droga.
Apan kaulahian, gibawi ni Morales ang iyang mga testimoniya sa gipahigayong cross-examination kung asa gibutyag niya nga gipugos lamang siya sa iyang superior Director nga si Lyndon Aspacio nga mutestigo batok sa 2 Chinese.
Nabuhat lamang niya ang maong butang tungod nahadlok siya nga mapalagpot o mataral kung dili niya sundon ang matod pa mando kaniya.
Apan sa hukom sa korte batok kaniya, walay nakitang ebidensiya nga musuporta o magpamatuod sa mga claim ni Morales nga gipugos o gihadlok siya.
Kahinumduman nga si Morales usab ang usa sa mipirma matod pa sa na-leak nga PDEA operation report kaniadtong 2012 nga naglambigit kang Pangulong Ferdinand Marcos Jr. og aktres nga si Maricel Soriano sa ilegal nga droga.
