Gipanghimakak sa mga kanhi sundalo ang alegasyon nga gisuholan sila ni kanhi Kongresista Mike Defensor aron motestigo sa imbestigasyon bahin sa giingong maanomalyang mga proyekto sa flood control.
Atol sa pagdungog sa Senate Blue Ribbon Subcommittee kagahapong Huwebes, gipasiugda ni Johnny Buduan, usa sa 18 ka kanhing Marines nga mitambong isip resource person, nga wala sila modawat og kuwarta gikan kang kanhi Cong. Defensor sa dihang gipangutana sila ni Senador Rodante Marcoleta kon nakadawat ba sila og “pabuya” nga tag-P5 milyon aron ihatag ang ilang mga pahayag sa nagpadayong imbestigasyon sa flood control scandal.
Gihagit usab ni Buduan ang mga nag-akusar kanila nga motambong sa pagdungog sa subcommittee aron pamatud-an ang ilang mga alegasyon.
Matod pa niya, maayo na unta ang ilang kahimtang sa kinabuhi kon tinuod nga nakadawat sila og ingon kadakong kantidad sa kuwarta.
Samtang, gipanalipdan usab ni Atty. Levito Baligod ang mga kanhing sundalo batok sa alegasyon nga nakadawat sila og suhol.
