Nagpasang-at og complaint ang Philippine National Police-Criminal Investigation and Detection Group (PNP-CIDG) batok kang kanhi Negros Oriental Governor Pryde Henry Teves sa Department of Justice nga ilakip sa patung-patong nga kaso sa pagpatay kang kanhi Negros Oriental Governor Roel Degamo og sa siyam nga uban pa sa maduguong Pamplona massacre niadtong 2023.
Kahinumdoman nga nahitabo ang krimen sa mismong balay sa mipanaw nga gobernador samtang gipahigayon ang pag-apud-apod og ayuda sa mga benepisyaryo sa 4Ps o Pantawid Pamilyang Pilipino Program. Una ng milutaw nga ang igsuon ni Henry Teves nga si expelled Congressman Arnolfo Teves Jr. nga kasamtanang nabilanggo sa Timor Leste ang matod pa utok sa krimen.
Matod kang CIDG chief Maj. Gen. Nicolas Torre III, gisumite nila ang maong reklamo batok kang Henry Teves og siyam nga uban pa para sa case build up.
May bag-ong mga ebidensiya nga nadiskubre hinungdan gidugang nila kini para sa pagdungog para tun-an kung paunsa kini maapil ug mapresenta sa korte.
Gibutyag ni Gen. Torre nga may narekober ang mga awtoridad nga mga eksplosibo og mga armas.
Kalabot niini , imbestigahan pagmaayo ang reklamong gipasang-at batok kang Henry Teves para matumbok kung may paigong ebidensiya para suportahan ang mga kaso og kung magpadayon sa preliminary investigation.
Ugaling makumpirma sa imbestigasyon nga nasunod ang tanang importanteng elemento sa krimen, sertipikahan kini sa prosecutor nga may paigong basehan para magpadayon sa imbestigasyon.
Sa kasamtangan subling nagpapili si Henry Teves isip Gobernador sa Negros Oriental sa 2025 midterm elections ilawom sa Liberal Party.
Giklaro usab ni Gen. Torre nga walay sagol-pamulitika sa ilang nahimo lakang.
Gihimo usab ang maong rekomendasyon sa CIDG ilawom sa Department Circular No. 20 sa DOJ kung asa ang “reasonable certainty of conviction” og dili lamang “probable cause” ang angayang matumbok una bag-o magpasang-at og reklamo sa korte.
Samtang, wala pa usab gipagawas sa karon nga pahayag si Henry Teves kalabotan sa reklamo nga gisang-at batok kaniya sa CIDG.
