Gibutyag ni Senate President Pro Tempore Panfilo “Ping” Lacson nga ang kanhi DPWH Secretary Manuel Bonoan giingong nakadawat og handwritten “memos” gikan sa mga sibilyan o dili empleyado sa ahensya bahin sa mga proyekto nga angay aprubahan.
Si Lacson miingon nga kini usa lamang sa sunod-sunod nga mga iregularidad nga mitumaw sa imbestigasyon sa Senado sa mga proyekto sa gobyerno bahin sa pagkontrol sa baha ug imprastraktura.
Sumala sa senador, ang Blue Ribbon Committee mahimong mopalapad sa imbestigasyon niini aron maapil ang ubang mga proyekto sama sa mga farm-to-market roads, tungod sa balik-balik nga korapsyon sa DPWH.
Gipahibalo usab ni Lacson nga sa sunod nga Blue Ribbon hearing sa Nobyembre 14, ilang tawagon ang mga “importanteng saksi” nga mahimong maglambigit sa ubang mga ngalan, lakip ang pipila ka mga opisyal sa gobyerno.
Plano usab sa komite nga tawagan ang retirado nga T/Sgt. Orly Guteza, kinsa miingon nga siya ang naghatud og mga maleta nga puno sa kwarta sa mga balay ni kanhi Rep. Elizaldy Co ug kanhi Speaker Martin Romualdez, usa ka pasangil nga gihimakak ni Romualdez.
Dugang ni Lacson nga bisan pa man og balido gihapon ang testimonya ni Guteza, posible nga maapektuhan ang iyang kredibilidad human nadiskobrehan sa korte ang mga iregularidad sa iyang notarized affidavit.
