Opisyal nga nanumpa si kanhi Transportation Secretary Vince Dizon atubangan ni Presidente Ferdinand Marcos Jr. alang sa iyang bag-ong tahas isip Kalihim sa Department of Public Works and Highways (DPWH).
Gihulipan ni Dizon si kanhi Sec. Manuel M. Bonoan, epektibo karong adlawa, Lunes, Septiyembre 1, 2025.
Gimandoan ni Presidente Marcos si Dizon sa paghimo og hingpit nga pag-ayo sa departamento ug pagsiguro nga ang pondo sa publiko magamit lamang alang sa mga imprastraktura nga tinuud nga manalipod ug makabenepisyo sa katawhang Pilipino.
Aron masiguro ang padayon nga paghatag og serbisyo sa Department of Transportation (DOTr), gitudlo sa Presidente si Atty. Giovanni Z. Lopez isip Acting Secretary.
Si Atty. Lopez nanumpa isip Undersecretary for Administration, Finance, and Procurement niadtong Pebrero 2025.
Nagserbisyo siya isip Chief of Staff sa Office of the Secretary gikan sa 2020 hangtod 2022 ug naghupot og mga senior position nga nagdumala sa mga kritikal nga ‘railway, aviation, ug maritime infrastructure projects.’
Isip Acting Secretary, si Atty. Lopez mosiguro nga ang mga inisyatiba nga gipasiugdahan sa pamunoan ni Sec. Dizon, partikular na ang pag-uswag sa transport modernization ug pagsuporta sa inisyatiba nga nag-una sa ‘commuter safety, efficiency, and seamless project delivery,’ mapadayon ug malamposon.
