Nakabayad og piyansa si kanhi Department of Health Secretary Francisco Duque III sa graft charges batok kaniya.
Sumala sa kanhi kalihim, gilayon siya nga nakapiyansa niadtong Setyembre 4 human masayran ang gipasaka nga kaso sa Office of the Ombudsman sa Sandiganbayan.
May kalabotan kini sa matud pa ilegal nga pagbalhin sa DOH sa PS-DBM sa multi-billion pesos nga salapi alang sa pagpalit og COVID-19 medical supplies kaniadtong atol sa pandemiya.
Gidugang pa ni Duque nga mangita siya og mga legal nga remedyo aron kwestiyunon ang resolusyon sa Ombudsman dili lamang sa Sandiganbayan kun dili bisan sa Korte Suprema.
Una na nga nagpiyansa si kanhi Department of Budget and Management USec. Lloyd Christopher Lao nga gikasuhan usab og graft charges human giaresto samtang paingon sa korte aron magbayad ug piyansa nga nagkantidad og P90,000 kaniadtong buntag sa Miyerkules.
