Magpapili gihapon sa 2025 midterm elections si kanhi Caloocan City Representative Edgar “Egay” Erice bisan sa nauna niining pagkuwestiyon sa pagpabor sa Commission on Elections sa Miru Systems.
Uktobre 4, 2024 nagduso si Erice sa iyang kandidatura sa pagka-kongresista sa maong siyudad.
Pagkahuman makaduso sa kandidatura, napangutana ang kanhi magbabalaud kabahin sa paggamit sa mga Automated Counting Machines (ACM) sa Miru Systems, ang technology provider sa Comelec alang sa May 2025 midterm elections.
Tubag ni Erice, mahimong gamiton ang mga makina sa Miru apan kinahanglan na nga mag-resign ni Comelec Chair George Erwin Garcia.
Gihingusgan ni Erice, bias ang Comelec chairman sa Miru, og angayan nga dili bias nga lider ang manguna sa eleksyon.
Pipila ka bulan una niini, gikuwestyon sa kanhi kongresista ang pagpabor sa komisyon sa Miru Systems human makuha sa South Korean firm ang kontrata alang sa 2025 Elections.
Kanhi na usab nga nagsang-at og petisyon si Erice sa Korte Suprema aron ipadeklara isip invalid ang Comelec-Miru contract nga gitawag niining ‘100-percent illegal’ ug supak sa Republic Act (RA) 9369 o Automated Election Law.
Gisaway usab ni Erice ang matod pa hilabihan kamahal nga bayran sa gobyerno alang sa serbisyo sa Miru.
