Gibutyag ni Senador Panfilo Lacson nga si kanhi Bulacan assistant district engineer Brice Hernandez nisumite og mga kompyuter, dokumento, ug uban pang ebidensiya aron pagmatuod sa giingong pagkalambigit sa pipila ka mga magbabalaod sa mga anomaliya sa mga proyekto sa flood control.
Kahinumduman nga si Hernandez, kinsa natanggong sa Senado, temporaryong gibuhian niadtong Sabado aron makuha ang mga ebidensiya nga giselyohan na karon samtang nagpaabot sa pormal nga eksaminasyon.
Una nang gihinganlan ni Hernandez sila si Senador Jinggoy Estrada, Senador Joel Villanueva, ug kanhi Caloocan Rep. Mitch Cajayon-Uy nga giingong benepisyaryo sa kickback, nga gipanghimakak sa tulo ka opisyal.
Samtang, niinsister si Lacson nga kinahanglang ipasabot ni resigned DPWH Secretary Manuel Bonoan kon sa unsang paagi ang kapin sa P600 milyon gikan sa Syms Construction na-deliver kang Sally Santos ngadto sa District Engineering Office sa Bulacan.
Gisaway usab niya ang presensiya ni DPWH Undersecretary Roberto Bernardo sa hulagway uban ni Hernandez ug ubang mga engineers sa Bulacan 1st District.
Si Bonoan ug Bernardo gipaabot nga imbitahon sa sunod nga Senate Blue Ribbon Committee hearing karong Septiyembre 22.
