Nagpahibalo ang European Commission og plano nga limitahan ang pag-access sa social media alang sa mga menor de edad nga nag-edad og 15 paubos aron mas mapalambo ang kaluwasan online.
Ubos sa EU Kids Act, ipatuman ang usa ka “gradual approach” o hinay-hinay nga pamaagi bahin sa paggamit sa mga menor de edad sa social media. Ang mga nag-edad og 13 hangtod 15 tugotan lamang nga maka-access sa mga social media platform pinaagi sa “mini-accounts” nga gidumala sa ilang mga guardian.
Dugang pa nga gipahayag sa European Commission nga kinahanglang pamatud-an sa mga kompanya sa social media nga ang ilang mga platform “safe by design” o luwas na daan base sa pagkadisenyo niini.
Ang mga kompanya nga mapakyas sa pagsunod niini nga mga regulasyon mahimong atubangon ang multa nga moabot sa 6% sa ilang kita.
Naglatid usab ang sugyot nga kadto lamang mga indibidwal nga nag-edad og 15 pataas ang mahimong maghimo sa ilang kaugalingong mga social media account.
Kung mapasar kini isip balaod, makaapekto kini sa mga sikat nga social media application sama sa TikTok, Instagram, ug Snapchat, lakip na ang YouTube, AI chatbots, ug mga online game. Subay niini, gikinahanglan nga mosumite ang mga kompanya sa social media og detalyadong mga plano alang sa kaluwasan sa mga bata.
