GENERAL SANTOS CITY – Nakuyapan ang usa ka istudyante samtang nagpila kini sa taas nga linya sa pamasin nga makakuha ug cash aid gikan sa DSWD.
Maayo na lamang kay nasalo kini sa usa ka Ginang nga anaa sa likod sa nasangpit nga istudyate.
Gilayon usab kini nga gisakay sa patrol sa mga Kapulisan pinaagi usab sa mga otoridad nga nakabantay lang sa palibot sa hilabihan ka taas nga pila.
Kahibaloan nga wala gihapon nahan-ay ang ikaduhang Sabado sa pag apod-apod sa educational cash aid kung asa nakamugna gihapon kini ug kalibog ngadto sa mga residente luyo nga aduna nay gipagawas nga anunsiyo ang DSWD nga kinahanglan magpa-register una online ug siguruon nga ma-enroll ang benepesyaryo sa website una makadawat sa cash aid.
Kahibaloan nga wala na nasunod ang mga health protocols ug gani, iya-iya nag dala ug mga karton ug bangko ang ubang mga residente nga anha na nagpalabay sa gabii sa payout site sa DSWD sa gymnasium sa Brgy. Bula og Dadiangas West Elem. School.
