Niinsister si Senate President Pro Tempore Ping Lacson nga wala pa makalingkawas sila si Senador Jinggoy Estrada ug Joel Villanueva sa isyu sa budget insertions.
Gitataw ni Lacson nga mahimong “selective” ang memorya sa mga mibisita kanila, apan wala kini magpasabot nga nakalingkawas na sila sa isyu sa gatusan ka milyon ka pesos nga kantidad sa insertion sa General Appropriations Acts (GAAs) para sa 2023 ug 2025.
Ang senador niingon nga ang P600 milyon nga giingong gigahin alang sa flood control projects sa Bulacan nakit-an sa unprogrammed funds sa 2023 GAA, nga gipasangil ni Hernandez kang Villanueva. Si Villanueva gipanghimakak ang maong pasangil.
Matud ni Lacson nga ang P600 milyon nakaplagan sa dokumento gikan ni Senador Sherwin Gatchalian.
Atol sa pagdungog sa Blue Ribbon Committee, gitumbok ni Hernandez nga ang giingong flood control projects ni Villanueva gikan sa unprogrammed funds sa 2023 GAA.
Si Lacson sa sayo pa miingon nga ang P355 milyon nga kantidad sa mga proyektong imprastraktura sa Bulacan nga gilambigit ni Hernandez kang Sen. Jinggoy Estrada nakaplagan sa 2025 GAA. Gihimakak usab ni Estrada ang maong pasangil.
Si Lacson niingon nga iyang gitugotan ang duha ka mga senador nga makatambong sa husay tungod kay usa kini ka sukaranang katungod ni bisan kinsa nga makig-atubang sa ilang mga akusado.
Dugang ni Lacson nga ang matag indibidwal, ordinaryo man o senador, adunay managsama nga katungod.
Siya usab miingon nga siya mikonsulta sa iyang legal nga mga kawani sa wala pa mohimo sa desisyon sa pagtugot kanila sa pagtambong.
Sa laing bahin, ang duha ka mga senador wala pa maklaro sa isyu sa budget insertions ubos sa 2023 ug 2025 GAA.
