Gipaabot ni Senate President Pro Tempore Jinggoy Estrada nga tumanon sa Senado ang desisyon sa Korte Suprema kalabot sa articles of impeachment batok kang Bise Presidente Sara Duterte atol sa pag-abli sa 20th Congress.
Matod ni Estrada, kini nga desisyon importante isip pahinumdom nga bisan ang mga kaso nga gitumong sa pagpanubag sa mga opisyal kinahanglan nga base gihapon sa legalidad ug due process.
Dugang pa sa senador nga isip patas nga sanga sa gobyerno, kinahanglang tahoron ug sundon sa Kongreso ang desisyon sa Korte Suprema.
Matod niya nga bisan og usa ka politikanhong proseso ang impeachment, kinahanglang ipatuman gihapon kini subay sa balaod ug due process aron masiguro nga ang mga lakang dili basta-basta o magiyahan sa personal nga politikanhong tumong.
Sa kataposan, niingon si Estrada nga mahimo nang tutukan sa Kongreso ang mga isyu nga giatubang sa nasud, apil na ang danyos sa sunodsunod nga mga bagyo.
