GENSAN- Posibleng moatubang og civil liability ang eskwelahan nga nahimong lugar sa school shooting sa Tacloban City kung mapamatud-an nga adunay kakulangan sa seguridad nga maoy hinungdan nga nakasulod ang mga pusil sulod sa campus, sumala kang Atty. Barry Quimno, miyembro sa kapulisan sa General Santos City Police Office.
Matod pa niya nga ang pagkarekober sa kapin 40 ka basiyo sa bala ug ang pag-ilis pa matod sa magazine sa usa sa mga pusil nagpakita nga adunay klarong tuyo ang mga suspek sa pagpabuto sa armas. Gipasabot usab ni Quimno nga tungod kay mga menor de edad ang mga suspek, sila pagadumalaon ubos sa Republic Act 9344 o Juvenile Justice and Welfare Act ug i-turn over sa Department of Social Welfare and Development (DSWD).
Matod kaniya, ang mga suspek nga ubos sa 15 anyos dili mahimong manubag sa kasong kriminal ug ipaagi lamang sa intervention program, samtang ang mga edad 15 hangtod ubos sa 18 anyos mahimong manubag kon mapamatud-an nga adunay discernment o kahibalo sa mga sangputanan sa ilang gibuhat.
Ang DSWD ang maoy maghimo sa assessment kung adunay discernment ang mga menor de edad ug dili ang kapulisan. Dugang pa ni Quimno, base sa mga lihok sa mga suspek, makita nga posible nga nasabtan nila ang ilang mga gihimo, apan gipasiugda niya nga ang opisyal nga pagdetermina niini magdepende gihapon sa DSWD.
Samtang, gipasidan-an usab ang publiko nga respetuhon ang confidentiality sa identidad sa mga menor de edad nga nalambigit sa maong insidente
