Nanawagan si Presiding Officer Francis “Chiz” Escudero og pagpugong, respeto ug pagkamatarong sa tanan nga nalambigit sa impeachment trial batok kang Vice President Sara Duterte, human giingong misamot ang tensyon ug emosyon atol sa mga hearing.
Sa iyang pahayag sa wala pa gisugdan ang hearing, miingon si Escudero nga nasabtan niya nga nagkagamay na ang pasensya sa pipila ka tawo ug misaka ang emosyon samtang nagpadayon ang pagdungog.
Apan iyang gipadayag nga dili angay kalimtan sa tanan ang ilang katungdanan nga motabang sa Impeachment Court aron patas ug hapsay nga maresolba ang kaso.
Gipahinungod ni Escudero nga dili angay maapektohan ang mga senator-judge sa mga pahayag gikan sa sulod o gawas sa korte.
Matod niya, ang pagdungog dili bahin sa personal nga interes sa bisan kinsa, kondili mahitungod sa ‘accountability’ ug pagkamatarong.
Giawhag usab ni Escudero ang mga abogado nga magpabiling respetado ug matinahuron ngadto sa ilang mga kauban nga abogado, subay sa Canon 2, Section 2 sa Code of Professional Responsibility and Accountability.
Matod pa niya, mahimong init ang mga panaglalis ug pagsaway, apan dili kini angay moabot sa personalan o paglapas sa dignidad sa ubang tawo.
Dugang pa ni Escudero nga sa pagtapos sa pagdungog, ang balaod ug dili ang kasuko ang angay mopatigbabaw.
