Aduna pay igong suporta gikan sa mga kaubang senador aron magpabilin si Senador Francis ‘Chiz’ Escudero isip Senate President.
Matod ni Senador Joel Villanueva, masaligon siya nga makakuha og igong suporta si Escudero.
Dugang pa niya nga iyang nahinabi ang mayoriya sa mga senador ug nipadayag sila sa ilang suporta para kang Sen. Chiz.
Mga 13 ka mga senador ang nipadayag sa ilang suporta kang Escudero nga magpabilin isip presidente sa Senado.
Gipadayag usab niya ang iyang suporta kang Escudero tungod sa maayong buhat nga iyang gipakita.
Si Villanueva, kinsa mayorya nga lider sa 19th Congress, niingon nga sa pagsugod sa 20th Congress sa Hulyo, mabakante na ang tanang posisyon sa liderato sa Senado.
Gikan sa Senate president, president pro tempore, majority leader ug minority leader, adunay re-election.
