Gipadayag ni Senate Committee on Energy Chairman Erwin Tulfo ang pag-amendar sa Oil Deregulation Law aron mahimong mas klaro ug transparent ang pamaagi sa pagtakda sa presyo sa lana sa nasod.
Matud ni Tulfo, kinahanglan nga hatagan og mas dakong gahum ang Department of Energy o DOE aron makapangayo og klarong pasabot gikan sa mga kompanya sa lana matag higayon nga magpatuman kini og pagsaka sa presyo.
Pahayag sa senador, dili angay nga basta na lamang ipasa ngadto sa mga motorista ug transport sector ang kalit nga pagsaka sa presyo sa krudo nga walay klarong pagpasabot kung giunsa pagtakda ang presyo.
Dugay na usab nga gihangyo sa transport sector ang mas klaro nga pagpasabot sa mga pagbag-o sa presyo sa lana tungod kay direktang nakaapekto kini sa ilang panginabuhian ug sa presyo sa mga palaliton.
Gikumpara usab ni Tulfo ang Oil Deregulation Law sa Electric Power Industry Reform Act o EPIRA, nga matud niya, nahimong hinungdan sa pagpasa sa pipila ka gasto sa mga kompanya sa kuryente ngadto sa mga konsumidor.
Apan giinsist ni Tulfo nga dili lamang ang kadako o kagamay sa mahimong maminusan sa presyo sa lana ang angay tan-awon.
Matud niya, importante ang matag usa ka pisong matigom sa ordinaryong mga Pilipino, ilabina karon nga taas ang presyo sa lana ug uban pang mga panginahanglanon.
