Nisaad ang Energy Regulatory Commission (ERC) nga sulbaron sa labing dali nga panahon ang dul-an sa 5,000 ka mga kaso nga pending sa opisina niini, lakip ang mga aplikasyon alang sa Power Supply Agreements (PSAs), Capital Expenditure (CAPEX), rate resets sa pribadong distribution utilities, ug uban pang mga rate-related issue.
Matod ni ERC Chairperson Francis Saturnino Juan, ang matag commissioner hatagan ug oversight head aron masiguro ang dali nga aksyon sa matag kaso.
Gipasiugda usab ni Commissioner Floresinda Baldo Digal ang kamahinungdanon sa pagbaton og “reconciled case inventory” aron masugdan ang epektibong pagsulbad sa mga backlogs.
Samtang, si Commissioner Paris Real miinsister nga kinahanglang unahon ang mga kaso nga dugay nang pending sukad pa sa panahon sa kanhi Energy Regulatory Board (ERB).
Isip kabahin sa lakang sa pagpadali sa proseso, ang ERC mohunong sa pag-post sa Notice of Commission Action (NCAs) aron malikayan ang kalibog, ug mopagawas na hinuon og opisyal nga mga desisyon sulod sa duha ka semana human sa matag meeting.
