Minimal lamang ang epekto sa Pilipinas sa plano sa Estados Unidos nga buwisan ang remittance o padalang kuwarta sa mga foreign worker nga nagpadala og salapi gikan sa Amerika paingon sa ilang nasud.
Matod ni Palace Press Officer Atty. Claire Castro, nakigkoordinar siya sa Department of Finance (DOF) ug gipasabot nga 20% lamang sa 4.4 milyon nga overseas Filipino workers (OFW) ang posibleng maapektuhan sa gi-proposed nga buhis nga ipatuman sugod Enero 2026, kon kini mapasar.
Sumala ni Castro, base sa pagtantiya sa DOF, ang gipaabot nga pagkunhod sa remittance gikan sa mga Pilipino sa Amerika sa tuig 2026 kay moabot sa \$100 milyon—gikan sa gikatakdang \$36.5 bilyon nga total remittances sa maong tuig.
Gipasabot niya nga minimal ra kini nga epekto kon ibase sa gross domestic product (GDP) nga 0.003%. Bisan pa niini, dako kini og epekto sa mga pamilya nga nagsalig lamang sa remittance gikan sa ilang mga paryente nga OFW sa Amerika.
Gipakita usab sa DOF nga pananglitan ang buwis sa matag \$100 nga remittance, moabot og \$3.50. Busa ang madawat sa pamilya sa Pilipinas kay \$96.50 na lang.
