Mipasalig si Albay Rep. Joey Salceda sa gobyerno sa ilang kaandam sa pagsiguro sa kaluwasan sa kapin sa duha ka milyon nga mga trabahanteng Pilipino sa gawas sa nasud, partikular na sa Middle East.
Nahitabo usab kini pagkahuman sa mga tensyon tali sa Iran ug Israel.
Gitumbok ni Salceda nga kapin sa 33% sa mga OFW ang naa sa Middle East, partikular na sa Saudi Arabia ug United Arab Emirates.
Iyang gitumbok nga ang P600 milyones nga budget nga gigahin sa 2020 kinahanglang magsilbi nga benchmark sa 2026 national budget, partikular na ang pundo para sa pagpauli.
Giawhag ni Salceda ang Department of Migrant Workers ug ang Department of Foreign Affairs nga maglatid og contingency plans ug mosugyot og standby funds sa samang kantidad aron mapanalipdan ang kaayohan sa mga OFWs.
Gibutyag ni Salceda nga niadtong Enero 2020, ang Department of Labor and Employment adunay P600 milyones nga pundo alang sa repatriation ug welfare services tungod sa nagpadayong tensyon sa rehiyon.
Ang economist-legislator miinsister nga ang maong numero nagpabilin nga praktikal nga benchmark para sa 2026 proposals sa DFA ug DMW.
