Napabilin sa Filipino pole vaulter nga si EJ Obiena ang iyang korona sa Asian Athletics Championships human midaog sa iyang duwa sa Gumi Civic Stadium, South Korea.
Sa nahitabong duwa, si Huang Bokai sa China maoy nangulo sa jump-off apan wala mawad-i og paglaom si Filipino Obiena human malabwan ang iyang kontra pinaagi sa 5.77 metros nga ambak sa unang pagsulay.
Sila si Obiena ug Huang nakahawan og 5.72 metros sa ilang unang pagsuway ug 5.77 metros sa ilang ikaduhang pagsulay, apan ang duha napakyas sa ilang ikatulo nga pagsulay, sa paghawan sa 5.82 metros.
Ang bar gi-reset sa 5.77 diin si Obiena malampuson nga milukso sa unang pagsulay, samtang si Huang wala na makaapas.
Kahinumduman nga ikatulo na kini nga sunodsunod nga gold medal ni Obiena sa Asian Athletics Championships.
Sa laing bahin, laing Pinoy nga si Hokett delos Santos ang mitapos sa ika-13 nga puwesto, human sa paghawan sa 4.97 metros. Napildi lang niya si Muhammad Naufal Shahrul Afzam sa Malaysia tungod sa countback.
