GENERAL SANTOS CITY – Nalagpot ang usa ka edarang babaye dihang pasakay na unta sa motorsiklo human nga gibanggaan sa sikad sa Amao Road Brgy. Bula atubangan mismo sa sibyahanan sa Bombo Radyo.
Natigayon kini pasado alas 4:00 kagahapon sa hapon kung asa nabanggaan usab sa sikad ang nakaparada nga Frontier nga sakyanan panag-iya ni Bombo Janjan Macailing.
Gilayong girespondihan sa Bula Police Station ang maong aksidente sa dalan kon asa nasuta nga lango sa ilimnong makahubog ang driver sa sikad nga nailhan nga si Roy Ramisa.
Nagkadugo ang ubos nga bahin sa mata, siko og tiil og lipong og halos dili makabakod ang nasampit gikan sa gibuy-uran nga yuta dihang naabtan sa kapulisan.
Sa pakighinabi sa Bombo Radyo, gibutyag sa driver nga gikan siya ug Sitio Tuning Lagao apan gilimod nga siya ang nagmaneho sa sikad inay si Renan Arguilles nga sa ulahi nasuta sa kapulisan nga mao ang tag-iya sa sikad.
Pulos gipangdala sa ospital ang driver sa sikad og ang edaran nga nailhan nga si Tihawa Usman, 71 anyos, kinsa nakaangkon ug samad sa iyang paa og kamot.
Pagsaysay sa edaran, pasakay na unta siya sa badja nga maneho sa iyang pag-umangkon nga si Rudy Tolentino paingon sa ospital apan kalit nga gibanggaan sa sikad hinungdan nga nalagpot.
Sa pagkakaron, padayon pang giimbestigahan sa Traffic Management Unit ang insidente kon asa una nang nasuta nga walay lisensiya ang driver og may temporary plate pa ang sikad.
Nasayran usab nga pulos nakaparada ang motorsiklo og sakyanan dihang gibanggaan sa sikad.
