GENERAL SANTOS CITY – Dul-an sa 70 ka kaso sa dengue ang natala sa dakbayan sulod sa usa ka semana.
Sa pakighinabi sa Bombo Radyo GenSan, gibutyag ni Dr. Lalaine Calonzo sa City Health Office, nga sa labing ulahing report Agosto 2, 2019 anaa sa 720 ang kaso sa dengue itandi sa miaging Hulyo 26, 2019 nga anaa sa 653 ka kaso.
Sa pamahayag ni Dr. Calonzo nga ang sua sa mga rason nganong kalit nga mitaas ang kaso sa dengue gumikan panahon sa sa ting-ulan gawas pa nga ang tuig 2019 ang gikonsidera nga outbreak cycle year.
Ang 720 ka kaso karong tuiga ang mas taas og 41% itandi sa susamang panahon sa miaging tuig nga anaa sa 510 ang nagkasakit.
Sa pamahayag ni Dr. Calonzo nga gumikan ang 2019 ang outbreak cycle year sa miaging tuig sugod na sila sa pagpangandam hinungdan nga ning higayon mas gamay ang kaso sa dengue sa GenSan ikumpara sa laing mga lugar sa Rehiyon 12 nga ang uban ang linibo na ang kaso.
Ang bugtong pamaagi aron makalikay sa dengue mao ang pagpanglimpyo sa gawas og sulod sa balay nga ang nag-unang may responsibilidad ang matag pamilya.
Kung may hilanat ang usa ka tawo angayang dad-on sa Rural Health Unit (RHU) aron ipailawom sa dengue rapid test nga libre nga gihatag aron masuta ang kondisyon sa pasyente.
