GENERAL SANTOS CITY – Dul-an sa 400 ang kaso sa dengue nga natala sa syudad. Kini base sa rekord sa City Health Office (CHO) gikan Enero 1 hangtod Mayo 10.
Matud sa CHO nga mukabat sa 399 ang dengue cases sa GenSan nga mas taas og 61 % itandi sa sa susamang panahon sa miaging tuig nga anaa sa 248 ka kaso.
Sa katibuk-ang kaso nga nareport ning tuiga ang tanang pasyente ang naospital.
Ug nasayran nga kasagaran sa mga nagsakit mga babaye nga anaa sa 53 % samtang ang pinakadaghang kaso sa dengue ang natala sa Brgy. Calumpang nga mukabat sa 67%.
Gisundan kini sa Labangal nga may 52 ka kaso, ikatulo ang Fatima- 44; San Isidro – 38; Apopong – 33; Tambler- 21; Lagao -21; Bula-20; Dadiangas West-18 og City Heights may 16 ka dengue cases nga natala.
Samtang nagpangidaron og 78 anyos ang pinaka-edaran nga nadala sa ospital tungod sa dengue.
Nagpasalamat ang CHO sa kooperasyon sa katawhan aron mapakgang ang maong makamatay nga sakit. Ug gani, ning tuiga walay natala nga namatay tungod sa dengue.
