GENERAL SANTOS CITY – Anaa na sa dul-an 900 ka kaso sa dengue ang natala dinhi sa siyudad ning tuiga.
Base kini sa report gikan sa City Epidemiology Surveillance Unit sa City Health Office.
Matud pa, anaa sa kinatibuk-ang 881 ka kaso sa dengue ang ilang natala alang ning tuiga, nga 54% nga mas ubos kon itandi sa natala nga kaso sa dengue miaging tuig, nga anaa sa 1,927.
Duha lamang ang natala nga namatay tungod sa sakit alang sa 2018, samtang walo kaniadtong 2017.
Nasayran nga sa Brgy Fatima ang may labing daghang kaso sa dengue nga natala sa siyudad, nga anaa sa 139 cases.
Ikaduha ang Brgy Calumpang nga may 134, ikatulo ang Labangal nga may 89, ika-upat ang Lagao nga may 86, ug ikalima ang San Isidro.
Samtang labing ubos ang natala sa Brgy Olympog, Upper Labay ug Batomelong nga aduna lamang tig-usa ka dengue case.
