Dul-an 200 ka manok nawala sa usa ka planta sa Brgy Conel

GENERAL SANTOS CITY – Giimbestigahan karon sa San Isidro Police Station ang usa ka planta sa Prk. Malinawon Conel ning syudad human nga nawad-an ug dul-an sa 200 ka manok.

Kini human nga nagpatala sa kapulisan ang head guard sa Socsargen Dressing Plant nga wala nagpabutyag sa iyang pangalan human nga nadiskubre kagahapon pasado ala una sa hapon nga nawala ang mukabat sa 191 ka dressed chicken.

Kabahin sa imbestigasyon ang tanang nagtrabaho sa planta.

Gani, gi-istudyohan na sa kapulisan ang kuha sa CCTV camera aron matumbok kung kinsa ang mga responsable sa pagkuha sa mga nasampit nga manok.

Gikabutyag nga desidido nga mupasaka og kaso ang tigdumala sa maong planta batuk sa mga nalambigit sa pagpangawat.