GENERAL SANTOS CITY – Gikatakda nang buhian sa mga New Peoples Army(NPA) ang gibihag nila nga duha ka sundalo didto sa Colombio, Sultan Kudarat.
Kini kon may ipatuman matud pa nga suspension of military operation kon SOMO. Kahinumduman nga pipila ka bulan nang anaa sa kamot sa mga naasoy’ng rebeldeng grupo silang Sgt. Solaiman Calocop ug Pfc. Samuel Garay gikan sa 39th Infantry Battalion.
Apan matud ni 10th Infantry Division Philippine Army Commander Major General Rafael Valencia, wala silay kinahanglang isuspenso nga operasyon gumikan wala matud pa silay gipahigayon nga operasyon sa nasampit nga lugar.
Hinungdan nga wala na matud pay rason nganong dili pa buhian sa mga rebelde ang duha ka sundalo. Gihingusgan usab sa nasampit nga opisyal nga dihang gihimo ang pagpangdagit kaniadto sa duha ka sundalo, Pebrero 2, may gipatuman matud pang ceasfire.
Hinungdan nga pa-traydor matud pa nga lakang ang gihimong pagpangdagit sa mga sundalo, gumikan gahimu-himo lamang ug isyu ug propaganda.
Gitawag pa niini ang naasoy’ng armadong grupo nga nuisance propaganda army.
Dungan niini, nanawagan si Maj. Gen. Valencia sa NPA nga kon sensiro sila sa hinabing pangkalinaw tali kanila ug sa gobyerno, kinahanglang ipakita nila kini pinaagi sa pagbuhi sa gidagit nilang mga sundalo, nga walay bisan unsang kondisyon.
