GENERAL SANTOS CITY – Gipailawom na sa hugot nga imbestigasyon ang duha ka pulis nga nagpasagad hinungdan nga nakaikyas ang piniriso nga naka-hospital arrest sa Dr. Jorge P Royeca Hospital.
Gipaniguro ni P/S/Insp. Richard Pabalinas, hepe sa Malungon Municipal Police Station, nga manubag ang duha ka nila ka sakop nga silang PO1 Ruel Mayora ug PO1 Rocky Padernal, kon mapamatud-an nga nagpasagad hinungdan nga nakaikyas ang piniriso nga si Junifer Zabala nga suspek sa pagpamusil sa usa ka barangay kagawad sa Malungon.
Sa inisyal nga impormasyon, gikabutyag nga nananghid ang usa sa mga bantay nga pulis nga mukaon kadali sa gawas, hinungdan nga usa na lamang ang nabilin kung asa may migawas nga impormasyon nga nakatulog samtang nagbantay.
Sa pagkakaron nagpadayon matud pa ang manhunt operation batok sa suspek nga nag-atubang ug patung-patong nga kaso, gawas pa nga may abilidad matud pa hilabi na sa pagpangawat ug pagtangtang ug posas sa kaugalingon.
