GENERAL SANTOS CITY – Nag-atubang ug kasong piracy ang duha ka mga pirata human gisaka ang usa ka tugboat sa Maasim, Sarangani.
Nagpabilin sa kustodiya sa Philippine Maritime-Gensan ang mga suspek nga silang Kadir Ganawan, 29 anyos ug Ronald Saltuan, 26 anyos, managsamang gikan sa Camalian, Davao Occidental.
Base sa imbestigasyon, gisaka sa mga nasampit ang MT Tugboat 308 sa Maasim, Sarangani kaniadtong Lunes, kauban ang tulo ka nagsilbing lookout, kung asa ilang gikuha ang mga pagkaon, krudo, bugas ug uban pang karga sa nahisgutang tugboat.
Matud kang Lt. Rolando Lorenzana sa Philippine Coast Guard-Gensan, nasikop ang duruha human nakapangayo ug tabang ang kapitan sa tugboat nga si Ricardo Padernal nga taga Misamis Occidental.
Nasayran nga ang MT Tugboat 308 ang gikan sa Misamis Occidental Power Plant ug may kargang construction materials paingon sa usa ka coal-fired power plant sa Maasim, Sarangani Province.
